PAGARPAR SA 26TH IB NGA PAGSURENDER SA NPA DAKUNG BAKAK

SULAT PAMAHAYAG
Nobyembre 25, 2017

Gipanghimaraut sa Western Agusan Norte-Agusan Sur (WANAS) SubRegional Operational Command ang todo largang pasismo nga binuhatan sa 26th IB PA ug mga para militar niini ilalom kang LtCol. Rommel S. Pagayon. Relihiyosong gipatuman sa 26th IB ang mando sa ilang amo nga si Presidenti Digong Duterte nga pitulon ang katawhang nakigbisog ug ipasurender ang NPA sa iyang panggamhanan.

Particular sa eryang langkob sa Front 88, gipagarpar nila nga kaniadtong September 30 adunay upat kuno ka membro sa NPA ang nagsurender ngadto sa 26th IB, October 15 laing upat na usab ug November 20 gisundan na pod sa laing nuwebe ka membro sa NPA. Gipasiatab nila nga misurender kini didto mismo sa ilang Battalion Headquarter sa Talacogon Agusan del Sur.

Nagmalampuson kintahay sila sa pagpasurender sa mga NPA nga naglihok aning dapita apan sa tinuod puro kini mga sibilyan nga lumolopyo sa Baranggay San Pedro ug Baranggay Binicalan lungsod sa San Luis ug Baranggay Lydia lungsod sa Lapaz. Dili kini lihetimong membro sa NPA-Front 88 kundili mga yanong lumolopyo kining mga tawhana.

Nahitabo kining mga pagsurender bunga sa grabeng pagpanglapas sa AFP sa tawhanong katungod ngadto sa mga sibilyan sama sa pugos nga pagpaangkon nga sila mga NPA, pagpanghaylo sa dagkung kantidad sa salapi, bangis nga interogasyon, pagpadala og mga mensahe ngadto sa hingtungdan nga adunay mahitabo kanila ug sa ilang pamilya kun ugaling dili motuman sa mando sa sundalo ug susama.

Mas grabe pa nilang binuhatan mao ang pagpangdakop sa 6 ka sibilyan ug lider sa tribo didto sa Baranggay Balit niadtong Octobre 27. Walay salaud kining yanong baryuhanon busa aron hatagan sa rason ang pagdakop ngadto kanila, ila kining gitamnan sa granada, druga ug pistola. Gisundan na usab kini sa pag-straping sa sentro mismo sa komunidad sa Sityo Kimambukadyang, Binicalan San Luis Agusan del Sur gamit ang 2 ka fighter plane alas2 sa kadlawon niadtong November 4.

Sulod sa kapin usa ka bulan na nga operasyon sa 26th IB , mimugna kini og grabeng kalisang, kahadlok, dislokasyon sa panginabuhian, disturbo sa pamuyo ug kagutom ngadto sa katawhan sa tribong Banwaon ug Manobo. Dahumon nga mas modugay pa kini tungod kay luyo aning bangis nga operasyong militar, mao man ang pagkompleto sa pagsukod sa yutang kabilin sa tribo,implementasyon sa NGP project ug pagplastar sa ilang mga pekeng organisasyong Lumad nga amomahon sa NCIP. Kini ang mohatag sa dalan ug kasigurohan sa capital sa mga negosyante nga magmina ug magplantation sa palm oil dinhing dapita.

Dakung hagit sa tibuok rebolusyonaryong kalihukan sa front 88 nga suklan kining magun-obon nga binuhatan sa pasistang militar sa estado. Batukan ang pagka-itoy ni Digong sa imperyalistang US ug suklan ang bangis nga laraw niya batok sa katawhan.

Ka Omar Ibarra
Spokesperson
New People’s Army
North Central Mindanao
Regional Command