npa company mindanao

Reyd sa NPA batok sa 58th IB sa Gingoog City, nagmadaugon

Pamahayag sa Media
July 12, 2015

Taas kamao nga gitimbaya sa New People’s Army – North Central Mindanao Regional Command ang mga Pulang kumander ug manggugubat sa NPA ubos sa Eastern Misamis Oriental Northeastern Bukidnon (NPA EMONEB) Sub-regional Command human ang malampusong pagreyd niini sa usa ka yunit sa 58th Infantry Battalion nga nagpundo sa Brgy. Hall ug nagpahigayon og COPD sa Alagatan, Gingoog City niadtong Hulyo 11, 2015, mga bandang alas 5:30 sa hapon. Walo ang kaswalidad sa reaksyunaryong tropa ug usa ang nabihag sa gubat o prisoner of war (POW); samtang nasakmit sa NPA gikan kanila ang duha ka haypawer nga armas ug uban pang kahimanang militar.

Giatake sa gerilyang platun sa NPA ang kapin kun kulang 10 ka tropa sa Bravo company sa 58th IB nga nagpahigayon og psywar ug intelligence operation sa Brgy. Alagatan ug gipangulohan ni 1st Lt. Valiente Palomino. Kamulo og dula og basketball ang reaksyunaryong kasundalohan sa sentro sa maong baryo dihang surpresa sila nga gireyd sa NPA. Milungtad og 20 minutos ang sinukliay og bala. Isip resulta, usa ang patay ug pito ang samaron sa mga tropa sa AFP samtang nakaangkon og minor nga pagkasamad ang usa ka Pulang manggugubat. Nasakmit sa NPA gikan sa reaksyunaryong kasundalohan ang usa ka K3 Light Machine Gun, usa ka M203 Grenade Launcher, duha ka ammo vest, tulo ka link sa bala machine gun, 12 ka bala sa 40mm ug duha ka military pack. Paspas ug organisadong nakawithdraw sa luwas nga lugar ang yunit sa NPA dala ang mga nakumpiska ug ang usa ka sundalong dinakpan.

Nabihag ug karon gikostudiya na sa NPA isip prisoner of war si Pfc. Adonis Jess Maghanoy Lupeba (serial number: 863573), 26 anyos, minyo ug lumulupyo sa Iponan, Cagayan de Oro City. Gipaneguro sa costudial unit sa NPA ang tukmang pagtagad kang Pfc. Lupeba isip POW subay sa balaod sa gubat, sa Comprehensive Agreement on the Respect for Human Rights and International Humanitarian Law (CARHRIHL), ug sa tulo ka lagda ug walo ka punto sa NPA lambigit sa makitawhanong pagtratar sa mga bihag sa gubat. Sama sa duha ka POW sa miaging tuig, andam kami sa pagpadaplin sa normal nga proseso sa imbestigasyon ug rebolusyonaryong hudisyal nga proseso kang Pfc. Lupeba ug dayon sa pormal nga pagrelease kaniya isip pagpakita sa maayong kabubut-on ug sinseridad sa rebolusyonaryong kalihukan sa pagpadayon sa peacetalks tali sa gubyernong Aquino. Gipasalig namo sa pamilya ug publiko nga anaa sa maayong kahimtang ug pagtratar si Pfc. Lupeba, ug nga makauli siya kung makatugot na ang kahimtang alang sa luwas ug hapsay nga pagrelease. Dugang kaming magpagawas og pahibalo sa iyang kahimtang matag karun ug unya.

Sa laing bahin, gikasubo namo ang pagkasamad sa duha sa sibilyan nga napagan sa armadong panagsangka—silang Helen Mae Helodo, 14 anyos ug si Leticia Cabrera. Ayha napadala sa hospital, nadapatan pa og first aid sa mga medic sa NPA si Cabrera. Gikataho nga luwas na sa peligro ang duha. Sa pinakadali nga panahon magpaabot kami og hinabang pinansyal aron makaabag sa ilang pagpatambal.

Samtang, subli namong ipahinumdom ang panginahanglan sa kusganong pagbabag ug pagkondena sa katawhan sa iligal nga pagpundo sa AFP taliwala sa sibilyang populasyon. Ang pagkampo sa COPD unit sa 58th IB sa mismong barangay hall sa Alagatan tataw nga kasupakan sa CARHRIHL ug nagbutang sa peligro sa kinabuhi sa mga sibilyan nga ilang gihimong human shield o taming batok sa NPA.

Sa makausa pa, gisaludohan namo ang NPA-EMONEB sa malampusong taktikal nga opensiba batok sa 58th IB ug gipasalamatan ang tanang katawhan nga mitabang ug nahimong inspirasyon sa maong aksyon. Sa hugot nga panaghiusa sa NPA ug katawhang dinaugdaug ug pinahimuslan, ug sa giya sa Partido Komunista ng Pilipinas, tataw ang pagkapakyas sa Oplan Bayanihan sa rehimeng US-Aquino ug segurado ang padayong pag-abante ug pagkab-ot sa daghan pang kadaugan sa nasudnon demokratikong rebolusyon nga may sosyalistang kapadulngan.

Pinirmahan,

Ka Allan Juanito
Tigpamaba
New People’s Army
North Central Mindanao Regional Command