Unom ka mga armas nasakmit sa NPA sa duha ka magkasunod nga mga opensiba sa Far South Mindanao

Valentin Palamine Regional Operations Command
Far South Mindanao Region | NEW PEOPLE’S ARMY

Sulat pamahayag
29 Setyembre 2017

Pagtimbaya sa mga Pulang manggugubat ug mga Pulang kumander sa Mt. Musa Subregional Operations Command – Far South Mindanao Region (MMSROC-FSMR) sa NPA sa ilang paglunsad og duha ka malampusong magkasunod nga mga opensiba!

Ang mga Pulang manggugubat sa MMSROC nakasakmit og unom ka mga armas sa naasoyng mga aksyon.
Niadtong Setyembre 23, malampusong gidisarmahan sa mga Pulang manggugubat ang punong barangay sa Brgy. Maligang sakop sa Kiamba, Sarangani Province. Usa ka ripleng Garand, usa ka caliber .380 nga pistola, ug usa ka 12-gauge shotgun ang nakumpiska gikan kaniya.

Sunod nga giatake ang mga armadong membro sa Civilian Volunteer Organization (CVO) sa Brgy. Tudok, T’boli, South Cotabato niadtong Setyembre 27. Walay nahimo ang mga paramilitar nga CVO ug diha-dihang gisurender ang ilang mga service firearms nga naglakip sa usa ka M16 Armalite rifle, usa ka ripleng Garand ug usa ka ripleng Carbine.

Nakasakmit sab ang mga Pulang manggugubat og usa ka handheld radio, 2 ka mga klip sa Garand, 2 ka magasin sa Carbine ug mga bala.

Ang kalamposan sa naasoyng mga aksyon nagapamatuod lamang nga pakyas ang kontrakatawhang pakana nga kontrainsurhensya sa reaksyunaryong estado.

Ilalom sa gambalay sa counterinsurgency (COIN) program sa AFP, nakigkunsabo ang pasistang 27th IB-PA sa labing despotikong mga lokal nga burukrata sa mga probinsya sa South Cotabato ug Sarangani aron pugsanong tukoron ang mga grupong paramilitar ug armasan ang mga barangay officials. Samtang ginapasitab sa 27th IB nga ang ilang programa nakatutok sa armadong kalihukang komunista, lantaran ginagamit nila kini aron nyutralisahon ang nagkakusog nga pagbabag sa katawhan sa langyawng agribisnes ug large-scale mining sa lugar.

Ka Dencio Madrigal
Tigpamâbâ, VPROC-FSMR